Президент Қасым-Жомарт Тоқаев педагогтердің құқығын қорғауға және білім беру жүйесін жетілдіруге бағытталған заңға қол қойды.
Заңдағы негізгі өзгерістер:
Мұғалімдерді қорғау және жүктемені азайту: Педагогтер мен мектеп басшылығының бала үшін жауапкершілігі тек сабақ уақытымен шектеледі, ал басқа уақытта ата-ана жауапты болады. Заңда қаралмаған есептерді талап етуге тыйым салынады. Құжаттарды бір мезгілде қағаз және электронды нұсқада жүргізуді міндеттегендер әкімшілік жауапкершілікке тартылады.
Телефон қолдануды реттеу: Оқу-ағарту министрлігі мектептерде оқушылардың ұялы телефондарды пайдалану қағидаларын бекітеді.
Академиялық адалдық: Білім сапасын арттыру мақсатында «академиялық адалдық» ұғымы енгізіледі.
Дарынды балаларды қолдау: Әкімдіктер өңірлік олимпиада, спорттық жарыс және ғылыми жоба жеңімпаздарының республикалық/халықаралық кезеңдерге қатысуын қамтамасыз етуге міндетті.
ЖОО-ға жеңілдік: WorldSkills халықаралық конкурсының жеңімпаздары университеттерге ҰБТ-сыз түсе алады.
Басқа да шаралар: Психологиялық-педагогикалық көмекке мұқтаж балаларды қолдау кеңейтіліп, шетелдік ЖОО филиалдарының қызметі мен медициналық кадрларды даярлау жүйесі реттеледі.
дереккөз: ОАМ
