Polisia.kz ақпараттық порталының мәліметінше, Қазақстан Республикасы Ішкі істер министрлігі есірткі бизнесіне қарсы кезекті ірі соққы жасап, Алматы облысының Қарасай ауданында жасырын жұмыс істеп тұрған есірткі зертханасын анықтады және жойды. Жедел-іздестіру іс-шаралары барысында 29 жастағы күдіктінің жеке үйді синтетикалық есірткі өндіретін орынға айналдырғаны белгілі болды. Заңсыз әрекетке қажетті жабдықтар мен химиялық реагенттерді жеткізу, сондай-ақ есірткі дайындау процесі толығымен интернеттің көлеңкелі сегменті (даркнет) арқылы ұйымдастырылған.
Тінту амалдарының нәтижесінде құқық қорғау органдары 28 килограмнан астам «α-PVP» синтетикалық есірткісін, 880 литр прекурсорды және арнайы зертханалық жабдықтарды тәркіледі. ҚР ІІМ есірткі қылмысына қарсы іс-қимыл комитеті төрағасының орынбасары Елдар Әбдікеновтің хабарлауынша, бұл тәркіленген заттар дайын синтетиканың алғашқы партиясы болған және оның көлемі шамамен 125 мың бір реттік дозаға тең еді.
Полиция қызметкерлерінің жедел әрі кәсіби әрекетінің арқасында бұл улы заттардың ешқайсысы заңсыз айналымға түсіп үлгермей, мыңдаған адамның денсаулығы мен өмірі аман қалды. Осылайша, өңірдегі криминогендік ахуалға елеулі қауіп төндіріп тұрған ірі «есірткі орталығының» жолы кесілді. Қазіргі уақытта бұл факт бойынша Қазақстан Республикасы Қылмыстық кодексінің 297-1-бабына сәйкес сотқа дейінгі тергеп-тексеру амалдары жүргізілуде.
Аталған баптың санкциясы кінәлі деп танылған тұлғаны өмір бойына бас бостандығынан айыру жазасына кесуді қарастырады. Ішкі істер министрлігі есірткі қылмыстарымен күрес мемлекеттік саясаттың ең басты бағыттарының бірі екенін және есірткі өндіру мен оны таратуға қатысты кез келген заңсыз әрекеттер бұдан былай да заң аясында қатаң түрде тоқтатылатынын ескертеді.
Дереккөз: Polisia.kz
