Қазақстан Республикасы Мәжілісі «Жануарларға жауапкершілікпен қарау туралы» заңға және оған байланысты бірқатар заңнамалық актілерге маңызды түзетулер енгізді. Бұл құжат қоғамдағы өзекті мәселелердің бірі — қараусыз жүрген жануарлардың санын реттеу мен азаматтардың қауіпсіздігін қамтамасыз етуді көздейді.
Жаңа өзгерістерге сәйкес, бұдан былай ұсталған қаңғыбас жануарларды бірден еркіндікке жіберуге тыйым салынады. Олар міндетті түрде уақытша ұстау пункттеріне тапсырылуы тиіс. Сонымен қатар, халықтың денсаулығын қорғау және түрлі жұқпалы аурулардың алдын алу мақсатында, қауіпті немесе ауру жануарларға эвтаназия (ұйықтату) қолдану мүмкіндігі заңдастырылды. Бұл өкілеттік жергілікті атқарушы органдарға жүктеледі.
Үй жануарларын есепке алу жүйесін жетілдіру мақсатында міндетті түрде чиптеу нормасы енгізілді. Енді жануарды тек ресми тіркеуде болған жағдайда ғана көбейтуге рұқсат етіледі. Бұл шара үй жануарларының бақылаусыз көбеюін шектеп, иелерінің жауапкершілігін арттыруға бағытталған. Айта кетерлік жайт, бұдан былай иесіз жануарларды мемлекеттік бюджет есебінен вакцинациялау тоқтатылады.
Заңның тағы бір маңызды тұсы — ашықтық. Енді қоғамдық бақылаушылар жануарлар панажайлары мен уақытша ұстау пункттеріне барып, олардың жағдайын тексеруге құқылы. Сонымен қатар, жергілікті органдар жануарларды жаңа иелеріне беруді насихаттайтын әлеуметтік жарнамаларды дамытумен айналысады.
Түзетулер «Ветеринария туралы» және «Жергілікті мемлекеттік басқару туралы» заңдарды да қамтып, әкімдіктердің жануарлар санын реттеу мен панажайларға қолдау көрсету жөніндегі өкілеттіктерін нақтылады.
Дереккөз: t.me/mazhilis_kz
