Теміртауда Qarmet өнеркәсіп кластері аясында «GLOVEX» компаниясымен бірлескен алғашқы өндірістік жоба — қайта өңделген материалдардан жұмыс қолғаптарын шығару өндірісі ресми түрде жұмысын бастады. Бұл бастама Qarmet компаниясының өнеркәсіптік кооперацияны кеңейту және ел ішінде қосымша құндылық қалыптастыру стратегиясының маңызды бөлігі болып табылады. Жобаның басты ерекшелігі — жабық циклді экономика принциптерін қолдануында, яғни шикізат ретінде пайдаланылған жұмыс киімдері мен текстиль қалдықтары қайта өңделеді. Мұндай тәсіл қалдықтар көлемін азайтып, экологиялық жүктемені төмендетуге, сондай-ақ тұрақты жергілікті жеткізу тізбегін құруға септігін тигізеді.
Қазіргі уақытта кәсіпорында 80 заманауи автомат жұмыс істеп, айына 300 мың жұп қолғап шығаруға қауқарлы, ал алдағы уақытта өндіріс көлемін 1 миллион жұпқа дейін ұлғайту жоспарланып отыр. Qarmet-тің стратегиялық даму директоры Тұрар Жолмағамбетов атап өткендей, жоба алдымен компанияның жеке қорғаныс құралдарына деген қажеттілігін толық өтеп, кейіннен өнімді еліміздегі басқа да ірі кәсіпорындарға жеткізуді көздейді. Өндірістің тұрақтылығы ұзақ мерзімді оффтейк-келісімшарттармен қамтамасыз етілген. «GLOVEX» компаниясы шикізатты ұсақтаудан бастап, дайын өнімді қаптауға дейінгі толық технологиялық циклді жүзеге асырады. Бұл қадам отандық өнеркәсіпті дамытуға, өндірістік инфрақұрылымды нығайтуға және қоршаған ортаны қорғауға бағытталған маңызды үлес болып табылады.
Дереккөз: Қарағанды облысы әкімдігі баспасөз қызметі
