Давос қаласында өткен Дүниежүзілік экономикалық форум (WEF)–2026 аясында Қазақстан делегациясы технологиялық компаниялар, халықаралық ұйымдар және қаржы институттарымен бірқатар нәтижелі кездесулер өткізді. Кездесулердің негізгі тақырыптары жасанды интеллект (ЖИ), GovTech, деректер орталықтары, телекоммуникация, финтех, киберқауіпсіздік және ЖИ-білім беру салаларын қамтыды.
Қазақстан атынан Премьер-министрдің орынбасары – ЖИ және цифрлық даму министрі Жаслан Мәдиев пен Президент Әкімшілігі басшысының орынбасары Асель Жанасова қатысты. Олар цифрлық мемлекеттік басқару, инфрақұрылым, деректерді қорғау және ЖИ енгізу бағыттарындағы сессияларға қатысып, елдің цифрлық трансформациядағы тәжірибесін таныстырды.
Форумда Қазақстан OpenAI, NVIDIA, G42 International, DeepLearning.AI, Royal Philips және басқа да халықаралық серіктестермен ынтымақтастық мүмкіндіктерін талқылады. Еліміз бірыңғай цифрлық стек, Smart Data Ukimet, ұлттық суперкомпьютер Alem.Cloud және AI-агенттерді қолдану арқылы ЖИ экожүйесін дамытуға дайын екенін көрсетті. Сонымен қатар білім беру, денсаулық сақтау, өнеркәсіп және сыни инфрақұрылым салаларында инновациялық шешімдерді енгізу және жобаларды ауқымдауға дайын екені атап өтілді.
Давостағы кездесулер Қазақстанның жасанды интеллект пен цифрлық трансформация саласындағы халықаралық ынтымақтастығын нығайтуға және AI-экожүйесін дамытудағы ұлттық тәсілдерін таныстыруға мүмкіндік берді.
