Мерекеге өңірдің қалалары мен аудандарынан 200 бала және облыстық этномәдени бірлестіктерінің балалары қатысты. Шара Қазақстан халқы Ассамблеясының құндылықтарын көрсететін бірлік, мейірімділік және өзара сыйластық атмосферасында ұйымдастырылды.
Мерекелік бағдарлама аясында кішкентай қонақтар үшін қазақ тіліне дубляждалған «Ледниковый период – 3» анимациялық фильмі көрсетіліп, аниматорлардың қатысуымен көңілді ойындар өткізілді. Сондай-ақ, Қарағанды облыстық ҚХА шыршасының жанында «Шаңырақ астындағы жаңа жыл!» жарқын мерекелік қойылымы ұсынылды.
Қатысушыларға облыстық ішкі саясат басқармасының басшысы Нұрлан Бикенов пен Қарағанды облыстық «Жомарт жан» орталығының төрағасы, «Умырзая» татар-башқұрт этномәдени бірлестігінің Құрметті мүшесі Шамиль Осин жылы лебіздерін білдірді.
Көрермендерді өнерпаздардың жарқын қойылымдары, көңілді сайыстар мен ойындар, мерекелік атмосфера, сондай-ақ тосынсыйлар мен жаңа жылдық сыйлықтар қуанышқа бөлеп, тамаша көңіл-күй сыйлады және балаларға ұмытылмас әсер қалдырды.
Аталмыш шара — Қазақстан халқы Ассамблеясының әлеуметтік миссиясын жүзеге асырудың, қоғамдық келісімді нығайту, балаларға қолдау көрсету және өзара түсіністік пен бірлік дәстүрін дамытудың тағы бір айқын көрінісі.
