Қазақстандық мектептерде жасанды интеллект (ЖИ) технологияларын қолдану енді ресми әрі жүйелі түрде жүзеге асырылатын болады. Ы. Алтынсарин атындағы Ұлттық білім академиясы педагогтер мен оқушыларға арналған арнайы әдістемелік нұсқаулықты әзірлеп, ЖИ-ді оқу процесіне енгізудің шекараларын нақтылады.
Әдістеменің ең негізгі ұстанымы — жасанды интеллект мұғалімді алмастырмайды. Технология тек сабаққа дайындалуға, материалдарды әр оқушының деңгейіне қарай бейімдеуге және деректерді талдауға көмектесетін қосымша құрал ретінде қарастырылады. Оқу мазмұнын таңдау, оқушының білімін бағалау және кез келген маңызды шешім қабылдау құқығы толықтай мұғалімнің құзырында қалады. Білім нәтижелерін бағалауды толық автоматтандыруға жол берілмейді, сондықтан ЖИ дайындаған кез келген материалды мұғалім тексеруден өткізуі тиіс.
Құжатта цифрлық қауіпсіздік пен академиялық адалдық мәселесіне басымдық берілген. Оқушылардың жеке деректерін бөгде сервистерге енгізуге тыйым салынады, ал қолданылатын платформалар ел заңнамасына сай болуы шарт. Сонымен қатар, оқушылар ЖИ арқылы орындалған жұмысты өз еңбегі ретінде ұсына алмайды. Егер мұғалім тапсырманың адал орындалғанына күмәнданса, оны қайта тапсыртуға құқылы.
Педагогтерге көмек ретінде нұсқаулықта Canva, ChatGPT, Gemini, Notebook LM және Google Lens сияқты сервистерді сабақта қолданудың дайын алгоритмдері мен сценарийлері берілген. Бұл мұғалімнің әкімшілік жүктемесін азайтып, шығармашылыққа көбірек уақыт бөлуіне мүмкіндік береді.
Бұл маңызды құжат Ұлттық білім академиясының ресми сайтында жарияланды. Ол мектептердің цифрлық трансформациясын жүйелі жүргізуге бағытталған стратегиялық қадам болып табылады және мұғалімдерден бастап оқушылар мен ата-аналарға дейін бағыт-бағдар беретін негізгі құралға айналмақ.
Дереккөз: Оқу-ағарту министрлігі баспасөз қызметі
