Астанада Қазақстан Республикасы Ұлттық архивінің 20 жылдығына орай «Архивтер: цифрлық трансформация, конституциялық құндылықтар, тарихи мұра» атты халықаралық ғылыми-практикалық конференция өтті.
Жиынға Премьер-министрдің орынбасары – Мәдениет және ақпарат министрі Аида Балаева, мемлекеттік органдардың өкілдері, Түркия, Ресей, Өзбекстан, Сауд Арабиясы және Тәжікстанның архив мекемелерінің басшылары мен сала мамандары қатысты. Іс-шара барысында Аида Балаева Мемлекет басшысы Қасым-Жомарт Тоқаевтың құттықтау хатын оқып берді, онда Президент ұлт шежіресін тереңірек тануға мүмкіндік беретін архив қызметкерлерінің еңбегін жоғары бағалап, шетелдік архивтерден құнды құжаттарды елге жеткізудің маңыздылығын атап өтті.
Өз кезегінде Аида Балаева тарихи-мәдени мұраны сақтау конституциялық деңгейде бекітілгенін жеткізіп, Ұлттық архивке «Ұлттық» мәртебе берілетінін қуанышты жаңалық ретінде хабарлады, сондай-ақ мерейтойға орай бірқатар ардагерлер мен мамандарға мемлекеттік наградалар табысталды. Бүгінде еліміздегі 237 мемлекеттік архивте 30 миллионға жуық құжат сақталып, оларда 3,5 мыңнан астам маман еңбек етуде. Саланы дамытудың басты бағыттарының бірі – цифрлық трансформацияның нәтижесінде цифрландырылған құжаттардың үлесі 3 пайыздан 26 пайызға өсіп, «Құжаттардың бірыңғай электрондық архиві» жүйесі енгізілді.
Конференция қорытындысы бойынша қатысушылар цифрландыру, жасанды интеллект технологияларын қолдану және халықаралық ынтымақтастық мәселелерін талқылап, саланы одан әрі дамытуға арналған нақты ұсынымдар мен қарар қабылдады.
дереккөз: t.me/madenietaqparat
