Заман талабына сай саналы әрі зерделі ұрпақ тәрбиелеу жолында кітап оқу мәдениетін қалыптастыру – уақыт күттірмейтін өзекті мәселе. Осы орайда ел көлемінде қолға алынған ауқымды жобалардың бірі – Мемлекет басшысының «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлығын жүзеге асыруға бағытталған «Кітап оқитын ұлт» республикалық марафоны.
Қазақстан Республикасы Мәдениет және ақпарат министрлігінің қолдауымен Креативті индустрияларды дамыту қоры мен «Кітап оқитын ұлт – Читающая нация» қоғамдық қоры өзара ынтымақтастық туралы меморандумға қол қойды. Бұл серіктестік ұлттық әдебиетті қолдауға, оқырман қатарын еселеуге және отандық кітап индустриясын жаңа сапалы деңгейге көтеруге жол ашады.
Жобаның басты мақсаты – қоғамда кітап оқуды сәнге айналдырып қана қоймай, рухани құндылықтарды тереңдету, қазақстандықтардың кітапқа деген қызығушылығын арттыру.
Биылғы марафон өзінің ауқымымен ерекшеленеді. Ұйымдастырушылардың жоспары бойынша, бұл бастама ел бойынша бір миллионнан астам адамды қамтиды.
Қатысушыларға арнайы ұсынылған тізімнен таңдау жасау мүмкіндігі беріледі. Бұл тізімге қазақ және орыс тілдеріндегі 300-ден астам шығарма енгізілген. Әрбір қатысушы осы туындылардың ішінен 15 кітапқа дейін оқи алады. Осылайша, жоба соңында жалпы оқылым санын 15 миллионға жеткізу көзделіп отыр.
Меморандум тек марафонмен шектелмейді. Оның аясында қалалар мен өңірлерде түрлі мәдени-ағартушылық іс-шаралар ұйымдастырылады. Атап айтқанда:
-
Ауқымды форумдар мен фестивальдер;
-
Кітап көрмелері мен қаламгерлермен шығармашылық кездесулер;
-
Танымдық дәрістер мен семинарлар өткізіледі.
Бұл шаралардың барлығы отандық авторлар мен баспалардың әлеуетін арттырып, әдебиет пен креативті индустрия арасындағы тығыз байланысты нығайтуға үлес қосады.
Білім мен ғылымды бәрінен биік қоятын қоғам құру жолындағы бұл марафон – әрбір саналы азаматтың рухани әлемін байытатын бірегей мүмкіндік.
Дереккөз: МАМ
