«Жасыл даму» АҚ әзірлеген EcoQolday цифрлық жүйесі еліміздегі қалдықтарды жинау және қайта өңдеу процесін жаңа деңгейге көтеріп, айналым экономикасын дамытуға елеулі үлес қосуда. 2024 жылғы тамыздан бастау алған жобаға бүгінде 159 кәсіпорын өтінім беріп, оның 96-сымен тиісті келісімшарттар бекітілді. Жүйе тиімділігінің артуымен қайта өңдеу көлемі тұрақты түрде өсуде: егер 2024 жылы 11,07 мың тонна қалдық өңделсе, 2025 жылы бұл көрсеткіш 49,34 мың тоннаға, ал 2026 жылдың алғашқы жартыжылдығында 70,63 мың тоннаға жетті. Жалпы есеп бойынша 131,04 мың тонна қалдық, соның ішінде негізінен қағаз, шыны, шиналар мен пластик қайта өңдеуге бағытталды. Осы мақсатта жүйе қатысушыларына бүгінге дейін 3,416 млрд теңге көлемінде төлем жасалды.
Цифрлық платформа сала кәсіпорындарымен қатар халықты да белсенді тартуда. Қалдық түзушілерден түскен 1 081 өтінім аясында 3 540,52 тонна шикізат жинақталды, оның басым бөлігін жеке тұлғалар тапсырған. «Жасыл даму» АҚ сонымен қатар «Таза үй – Таза ел» пилоттық жобасы аясында Астанада арнайы контейнерлер орнатып, қалдықтарды бөлек жинау мәдениетін қалыптастыруда. Жоба географиясын кеңейту мақсатында Ақтау, Ақтөбе, Шымкент және Талдықорған қалаларында тұрғындармен және басқару органдарымен түсіндіру жұмыстары жүргізілуде. Алдағы уақытта компания цифрлық тетіктерді жетілдіріп, қайта өңдеу көлемін арттыру және азаматтар мен бизнес өкілдері үшін барынша қолайлы жағдай жасау бағытындағы жұмыстарын жалғастыра бермек.
Дереккөз: https://t.me/EcologyofQazaqstan
