Қазақстанда Мемлекет басшысының бастамасымен қолға алынған «Аңсаған сәби» мемлекеттік бағдарламасының аралық қорытындылары жарияланды. 2021–2025 жылдарға арналған бұл ауқымды жоба еліміздегі қосалқы репродуктивтік технологиялардың қолжетімділігін түбегейлі жақсартып, мыңдаған жұпқа ата-ана болу бақытын сыйлады.
Бағдарламаның басты жетістігі — міндетті әлеуметтік медициналық сақтандыру (МӘМС) жүйесі аясында бөлінетін квота санының 7 есеге артуы. Егер бұрын бұл мүмкіндік шектеулі болса, қазір мемлекет тарапынан жыл сайын 7 мың квота бөлініп келеді. Осы жүйелі қолдаудың арқасында соңғы бес жылда 28 мыңнан астам әйел экстракорпоралдық ұрықтандыру (ЭКҰ) рәсімінен өтті.
Статистикалық мәліметтер бағдарламаның жоғары клиникалық тиімділігін дәлелдеп отыр. 12 мыңнан астам әйел сәтті түрде жүктілік бойынша есепке алынды, Бүгінгі таңда елімізде 11 мыңға жуық «бағдарлама сәбиі» дүниеге келді.
Денсаулық сақтау министрлігі көрсетілетін қызметтердің сапасын қатаң бақылауда ұстап отыр. Бес жыл бойы ЭКҰ орталықтарының жұмысына тұрақты мониторинг жүргізу арқылы МӘМС қаражатының ұтымды жұмсалуы мен әрбір пациент үшін оң нәтиженің жоғары болуы қамтамасыз етілді. Бұл бақылау тетіктері медициналық көмектің халықаралық стандарттарға сай болуына мүмкіндік береді.
Осылайша, «Аңсаған сәби» бағдарламасы тек медициналық жоба ғана емес, еліміздегі демографиялық жағдайды жақсартуға және отбасы институтын нығайтуға бағытталған маңызды әлеуметтік қадамға айналды.
дереккөз: https://t.me/DenMinPR
