Мемлекет басшысының тапсырмасына сәйкес, Қазақстанда теміржол инфрақұрылымын халықаралық стандарттарға сай жаңғыртудың ауқымды бағдарламасы қарқынды жүзеге асырылуда. Бұл жоба еліміздегі 124 вокзал нысанын кешенді жаңартуды көздейді.
Инфрақұрылымды жаңартудың қажеттілігі нысандардың тозуымен тікелей байланысты: вокзалдардың шамамен 70 пайызы соңғы 30 жыл бойы күрделі жөндеусіз пайдаланылып келген. Бағдарламаның басты мақсаты — жолаушылар үшін қауіпсіздікті қамтамасыз ету, навигацияны жақсарту және жүріп-тұруы шектеулі азаматтарға кедергісіз орта қалыптастыру.
Қазіргі таңда жұмыстар шешуші кезеңге өтті:
-
36 вокзалда қайта жаңарту толық аяқталды. Оның ішінде 2025 жылы Курорт-Бурабай, Талдықорған, Қазалы сияқты 19 нысан, ал 2026 жылдың алғашқы тоқсанында Сарышаған, Ағадыр, Шиелі және Тобыл бастаған 17 нысан пайдалануға берілді.
-
Тағы 46 вокзалда құрылыс-монтаж жұмыстары аяқталу сатысында тұр.
-
Жалпы алғанда, бүгінде 121 нысанда жұмыстар белсенді жүргізілуде.
Жаңғырту нәтижесінде жолаушылар заманауи күту залдарына, жаңартылған ақпараттық жүйелерге және озық инженерлік шешімдерге қол жеткізеді. Жоспар бойынша, қалған барлық нысандардағы жұмыстар ағымдағы жылдың соңына дейін толық аяқталып, еліміздің теміржол вокзалдары жаңа кейіпке енбек.
дереккөз: https://t.me/kolikpress
