Биылғы жазғы маусымда Қазақстан бойынша 11 135 демалыс орталығы өз есігін айқара ашып, жалпы саны 3,2 миллион баланы сауықтыру шараларымен және мазмұнды бос уақытпен қамтуды көздеп отыр.
Үкімет отырысында осы ауқымды жоспарлар туралы баяндама жасаған Оқу-ағарту министрі Жұлдыз Сүлейменованың мәліметінше, оқушылар үшін сан алуан бағдарламалар әзірленген.
Оның ішінде 3 миллионға жуық жеткіншек мектептер жанындағы лагерьлерде уақыт өткізсе, 168 мың бала маусымдық орталықтарға, ал 44 мыңнан астам оқушы жыл бойы үздіксіз жұмыс істейтін кешендерге барады.
Бұл ретте әлеуметтік қолдауды қажет ететін санаттағы балаларға ерекше басымдық беріліп, аз қамтылған отбасылардан шыққан 729 мың бала мен ерекше білім беру қажеттіліктері бар 53 мың бала жазғы демалыспен толық қамтылады.
Сонымен қатар халықаралық және республикалық деңгейдегі пәндік, IT-олимпиадалар мен шығармашылық, спорттық жарыстарда топ жарған 5 мың дарынды өрен республикалық «Балдәурен» және «Бөбек» орталықтарында денсаулығын түзеп, білімін шыңдаса, аймақтарда тағы 370 мың зерек балаға дәл осындай қолдау көрсетіледі. Оқушылардың қауіпсіздігі де басты назарда болып, барлық демалыс нысандарына арнайы полиция инспекторлары бекітілді және онда қызмет ететін мамандардың соттылығы жіті тексеруден өтті.
Министр өз сөзінде Мемлекет басшысы Қасым-Жомарт Тоқаевтың балалардың жан-жақты дамып, қолайлы жағдайда демалуына әркез ерекше көңіл бөлетінін тілге тиек етті. Осы орайда Президенттің ел аумағында 100 оқушылар сарайы мен өнер мектебін, сондай-ақ 50 балалар сауықтыру орталығын ашу жөніндегі тапсырмасы аясында соңғы үш жыл ішінде 24 мың орындық 44 қосымша білім беру ұйымы бой көтерді. Бұл құрылыс жұмыстары мұнымен тоқтамайды, өйткені үстіміздегі жылдың соңына дейін тағы 3 800 орынға лайықталған 10 нысанды пайдалануға беру жоспарланып отыр. Бұған қоса, аталған мерзім ішінде 2 800 баланы қабылдай алатын 15 сауықтыру орталығы ашылса, биыл тағы 840 орындық 4 жаңа орталық есігін ашпақ. Айта кетерлігі, жаңадан іске қосылып жатқан бұл қосымша білім беру нысандарының барлығы ең заманауи құрылғылармен, соның ішінде робототехника кабинеттерімен, IT зертханаларымен және арнайы ойын алаңдарымен жабдықталған, бұл балалардың бос уақытын барынша тиімді әрі қызықты өткізуіне кең мүмкіндік береді.
