Жаңа оқу жылынан бастап еліміздің мектептерінде айтулы өзгерістер орын алып, білім беру жүйесіне бірнеше жаңа міндетті пәндер енгізілетін болады. Үкіметтің кезекті отырысында жаңа Конституция нормаларына сәйкес оқу жоспарлары мен стандарттарын қайта қарау бағытында атқарылып жатқан жұмыстар туралы Оқу-ағарту министрі Жұлдыз Сүлейменова ресми түрде хабарлады.
Ведомство басшысының айтуынша, бұдан былай оқу бағдарламаларында тек құрғақ теорияны жаттауға ғана емес, оқушылар бойында азаматтық жауапкершілікті тәрбиелеуге және қазіргі құбылмалы әлемде қауіпсіз өмір сүру дағдыларын қалыптастыруға баса назар аударылады. Осы ретте, алдағы уақытта 5-7 сынып оқушылары үшін «Конституция негіздері» пәні енгізіліп, онда жеткіншектер Қазақстан Республикасының конституциялық құрылысы, азаматтардың негізгі құқықтары мен міндеттері, мемлекеттік басқарудың басты қағидаттары және құқықтық мәдениет негіздері туралы жүйелі білім нәрімен сусындайды. Бұған қоса, жоғары сынып оқушылары, яғни 8–11-сыныптар үшін «Заң мен тәртіп» атты міндетті курс оқытыла бастайды.
Бұл пәннің негізгі мақсаты – жастардың құқықтық санасын берік нығайту, жасөспірімдер арасындағы құқық бұзушылықтың алдын алу, заң талаптарын бұлжытпай құрметтеу мәдениетін қалыптастыру және азаматтық жауапкершілікті барынша арттыру болып табылады. Сонымен қатар, қазіргі заман талабына сай 5–11-сыныптардың оқу бағдарламасына «Жеке қауіпсіздік» міндетті курсы енгізіледі. Студенттер мен оқушылардың өмірлік қауіпсіздік мәдениетін қалыптастыратын бұл пән балалардың ақпараттық қауіпсіздік, кибергигиена, күтпеген төтенше жағдайларда дұрыс әрекет ету және түрлі қауіп-қатерлердің алдын алу бойынша практикалық дағдыларын жан-жақты дамытуға тікелей бағытталады.
Жаңартылған білім мазмұны ең алдымен өсіп келе жатқан тұлғаның жан-жақты дамуына, іргелі білімді нығайтуға, азаматтық жауапкершілікті қалыптастыруға және заманауи құзыреттерді дамытуға негізделетінін айтқан министр тәрбиелік компоненттің мазмұны да едәуір күшейтілетінін жеткізді.
Осылайша, білім беру жүйесіне «Адал азамат» бірыңғай тәрбие бағдарламасының құндылықтары, «Заң мен тәртіп» қағидаты, «Таза Қазақстан» жалпыұлттық бастамасы және жаңа Конституцияның негізгі идеялары мен құндылықтары толықтай интеграцияланатын болады. Нәтижесінде, отандық мектеп тек білім беретін құрғақ ұйым ғана емес, заңға зор құрметпен қарайтын, еңбекті жоғары бағалайтын, мемлекет пен қоғам алдындағы өз жауапкершілігін терең сезінетін саналы азаматтарды қалыптастыратын жасампаз ортаға айналады.
Дереккөз: primeminister.kz
