Қазақстан Республикасы Премьер-министрінің орынбасары – Ұлттық экономика министрі Серік Жұманғариннің төрағалығымен өткен кезекті кеңесте елдегі әлеуметтік маңызы бар азық-түлік тауарларының бағасы мен инфляция динамикасы талқыланды. Жиын қорытындысы көрсеткендей, елімізде инфляция деңгейі қатарынан бесінші ай бойы төмендеу үрдісін сақтап отыр.
Инфляция динамикасы және мемлекеттік бақылау
Ресми мәліметтерге сүйенсек, жалпы инфляция 2025 жылдың қыркүйегіндегі 12,9%-дан 2026 жылдың ақпанында 11,7%-ға дейін төмендеді. Азық-түлік инфляциясы да оң динамика көрсетуде: желтоқсандағы 13,5%-дан ақпанда 12,7%-ға дейін азайған. Бұған басты себеп ретінде әлеуметтік маңызы бар тауарлар тізімінің 19-дан 31 атауға дейін кеңеюі мен мемлекеттік бақылаудың күшеюі атап өтілді. Сауда комитеті жыл басынан бері баға үстемесін асырған кәсіпкерлерге қатысты 800-ден астам әкімшілік іс тіркеген.
Маусымдық баға өсіміне тосқауыл
Наурыз айындағы дәстүрлі маусымдық баға өсімін тежеу мақсатында Сауда және интеграция министрлігі қосымша акциялар ұйымдастырып, ауыл шаруашылығы жәрмеңкелерін кеңейтуді жоспарлап отыр. Сонымен қатар, көрші елдерден өнім жеткізуге арналған «жасыл дәліз» механизмі де өз жұмысын жалғастыруда.
Дегенмен, шикізат пен энергия ресурстарының қымбаттауы салдарынан сүт өнімдерінің бағасы өскені байқалды. Сүт өнімдері азық-түлік инфляциясының 6,3%-ын құрайтындықтан, Үкімет сүт өңдеу кәсіпорындарын қолдау тетіктерін қарастыруда. Атап айтқанда, елдегі 42 ірі кәсіпорындағы бағаның қалыптасуына талдау жүргізіліп, нан өндірушілер үшін арзандатылған астық пен теміржол тарифін төмендету мәселесі пысықталмақ.
Өңірлік ахуал және тұрақтандыру қорлары
Кеңес барысында Жамбыл облысындағы жағдай жеке қаралды. Өңірде өндіріс көлемі жоғары болғанымен, тұрақтандыру қорларындағы көкөністерді (картоп, сәбіз, пияз) сату қарқыны төмен екені сынға алынды. Мұндай баяу жұмыс қарқыны Ақтөбе, Қызылорда және Ұлытау облыстарында да байқалады. Қазіргі таңда республика бойынша картоп қорының 56%-ы, ал қырыққабаттың 58%-ы ғана сатылған.
Бақылау және тапсырмалар
Жиын қорытындысы бойынша Серік Жұманғарин Ауыл шаруашылығы министрлігі мен Сауда комитетіне өңірлердегі тұрақтандыру қорларына шұғыл тексеріс жүргізуді тапсырды. Негізгі міндет — әкімдіктердің есептік деректерінде көрсетілген өнімдердің қоймаларда нақты бар-жоғын анықтау және халықты қолжетімді азық-түлікпен қамтамасыз ету.
https://t.me/KZgovernment
