Венесуэладағы ұзаққа созылған саяси дағдарыс жаңа арнаға бұрылды. Николас Мадуро биліктен шеттетілгеннен кейін, Вашингтон елдің жаңа басшысы ретінде 56 жастағы вице-президент Делси Родригесті таңдады.
Дональд Трамп әкімшілігі оппозиция жетекшісі, Нобель сыйлығының лауреаты Мария Корина Мачадоның орнына прагматик технократ Родригесті қолайлы көріп отыр. АҚШ шенеуніктерінің пікірінше, Родригеспен жұмыс істеу Мадуроға қарағанда әлдеқайда кәсіби деңгейде өтпек.
Родригес санкциялар қыспағына қарамастан, Венесуэла экономикасын тұрақтандырып, мұнай өндірісін арттыра алды. АҚШ-тың энергетикалық сектордағы инвестицияларын қорғауға және қолдауға уәде берген. Ол өзін қатал қауіпсіздік қызметкерлерінен алшақ ұстап, шетелдік инвесторлармен және дипломаттармен тіл табыса алатын құзыретті маман ретінде көрсетті.
Бір қызығы, Трамп әкімшілігі Мачадоның Трампқа жағыну әрекеттеріне қарамастан, оған қолдау көрсетуден бас тартты. Президент Трамптың пайымдауынша, оппозиция жетекшісіне елді басқару үшін қажетті «құрмет» жетіспейді.
Дегенмен, АҚШ Родригеске толық сенім артып отырған жоқ. Вашингтон әзірге мұнай экспортына салынған шектеулерді күшінде қалдырып, Родригес АҚШ ережелерімен ойнамаған жағдайда әскери күш қолдану құқығын өзінде қалдырды.
Делси Родригес Маркстік партизанның қызы, Францияда еңбек құқығы бойынша білім алған. Уго Чавес пен Николас Мадуроның тұсында жоғары лауазымдарды иеленді. Мадуро тұсындағы репрессияларды ешқашан айыптаған емес, бірақ экономиканы «коррупцияланған социализмнен» «басқарылатын капитализмге» көшіруде үлкен тәжірибе жинақтаған.
Жуырда Делси Родригес әлеуметтік желі арқылы Трампқа үндеу тастап: «Біздің халық пен өңір соғысқа емес, бейбітшілік пен диалогқа лайықты. Венесуэланың егемендікке, дамуға және болашаққа құқығы бар», — деп жазды.
Сарапшылардың пікірінше, Трамп үшін демократия емес, ақша, билік және АҚШ-тың қауіпсіздігі маңыздырақ. Сондықтан Родригес Венесуэланың экономикалық элитасы мен Вашингтон арасындағы «алтын көпірге» айналуы мүмкін.
Reuters және The New York Times дереккөздеріне сүйене отырып дайындалды
