Астана қаласында балаларға арналған мамандандырылған медициналық көмектің қолжетімділігін арттыру мақсатында Ұлттық шұғыл медицинаны үйлестіру орталығының базасында жаңа травматологиялық пунктті ашуға дайындық жүргізілуде.
2025 жылдың қорытындысы бойынша елордада балалар жарақатының едәуір өскені байқалады. Медициналық көмекке жүгіну көрсеткіші 15,8%-ға артып, жағдай саны 97 333-тен 112 775-ке жеткен. Бұл фактор қолданыстағы травматологиялық пункттерге түсетін күшті шамадан тыс арттырды: қазіргі уақытта дәрігерлер тәулігіне 350-ден астам кішкентай пациентті қабылдап, үлкен жүктемемен жұмыс істеуде.
Ата-аналар мен қала жұртшылығы тарапынан медициналық көмек алудағы кезек пен шектеулерге қатысты білдірілген алаңдаушылық осы жаңа нысанның ашылуымен шешімін таппақ.
Ақпан айының соңына дейін 520 мың тұрғынға қызмет көрсетуге есептелген жаңа балалар травматологиясы бөлімшесі пациенттерді қабылдауды бастайды деп жоспарлануда. Қазіргі таңда келесі бағыттар бойынша жұмыстар атқарылып жатыр:
Мамандандырылған көмек көрсету үшін 11 анестезиолог-реаниматолог, балалар травматологтары және өзге де қажетті мамандар жұмысқа орналастырылып, ұйымдастырушылық мәселелер шешілуде.
Аурухананың балалар корпусы заманауи стандарттарға сай жабдықталуда. Пациенттер мен жедел жәрдем көліктеріне арналған ыңғайлы кірме жолдар, заманауи палаталар мен реанимациялық бөлімшелер толық техникалық жабдықтармен қамтылған.
Бұл бастама елордалық балаларға жедел әрі сапалы травматологиялық көмек көрсету жүйесін нығайтып, қолданыстағы емдеу мекемелеріне түсетін салмақты айтарлықтай жеңілдетпек.
Дереккөз: ДСМ сайты
