Қазақстанның азық-түлік қауіпсіздігі: Қайта өңдеу үлесі 70%-ға жетеді

Қазақстанның агроөнеркәсіптік кешені сапалы дамудың жаңа кезеңіне қадам басты. Биылғы жылдың қорытындысы бойынша елімізде өндірілетін ауыл шаруашылығы өнімін қайта өңдеу үлесін 70%-ға жеткізу жоспарланып отыр. Бұл туралы ҚР Премьер-министрінің орынбасары – Ұлттық экономика министрі Серік Жұманғариннің төрағалығымен өткен Экономикалық өсуді қамтамасыз ету жөніндегі жедел штабтың отырысында мәлім болды.

Өндірістің жоғары динамикасы

Жиын барысында өңдеу өнеркәсібінің жекелеген секторларын дамытудың алдын ала нәтижелері сараланды. Ағымдағы жылдың алғашқы екі айында азық-түлік және сусын өндірісі саласында айтарлықтай өсім байқалады. Мәселен, азық-түлік өндірісінің жалпы көлемі 665 млрд теңгені құрады. Бұл ретте нақты көлем индексі (НКИ) жоспарланған 104,3%-дан асып түсіп, 111,9%-ға жетті. Сарапшылардың болжамы бойынша, бірінші тоқсанның қорытындысы 112%-ды құрамақ.

Сусындар өндірісі саласы да тұрақты өсім көрсетіп отыр. Екі айдың ішінде бұл көрсеткіш 175,4 млрд теңгеге жетті. Салыстыру үшін айтсақ, өткен жылдың қорытындысы бойынша Қазақстанда 1,2 трлн теңгенің сусын өнімі шығарылған болатын.

Болашаққа бағдар: 2026 жылға дейінгі меже

Ауыл шаруашылығы вице-министрі Азат Сұлтановтың айтуынша, тамақ өнеркәсібі жүйелі даму серпінін көрсетіп келеді. Үкіметтің болжамына сәйкес, 2025 жылдың қорытындысы бойынша тамақ өнімін өндіру көлемі 3,9 трлн теңгеге дейін өседі деп күтілуде. Бұл 2024 жылғы көрсеткіштен (3,3 трлн теңге) 8,1%-ға жоғары. Ал 2026 жылы бұл межені 4,7 трлн теңгеге жеткізу басты мақсат болып айқындалды.

Бұл көрсеткіштер еліміздің шикізаттық бағыттан дайын өнім шығаруға көшу стратегиясының жемісті жүзеге асып жатқанын дәлелдейді. Өңдеу саласындағы мұндай ілгерілеушілік ішкі нарықты отандық өніммен толықтырып қана қоймай, Қазақстанның экспорттық әлеуетін арттыруға тікелей ықпал етпек.

primeminister.kz