Алматыдағы Перинатология және балалар кардиохирургиясы орталығында халықаралық сарапшылардың қатысуымен акушерлік және неонатология бойынша бірегей мастер-кластар өтті. Сербия мен Ресейден келген жетекші мамандар озық хирургиялық технологияларды, соның ішінде плацентаның кірігуі кезіндегі қан кетудің алдын алатын авторлық кесар тілігі әдістемесін таныстырды. Шара аясында Жамбыл облысынан келген науқасқа күрделі феталдық операция (амниоредукция) жасалып, нәрестелер реанимациясында иондаушы сәулеленусіз өкпені ультрадыбыстық зерттеудің жаңа алгоритмдері көрсетілді.
Еліміздің түкпір-түкпірінен 200-ден астам маман қатысқан бұл тренингтер онлайн режимде де көрсетіліп, өңірлік дәрігерлердің тәжірибесін арттыруға мүмкіндік берді. Мұндай жүйелі шаралар мен заманауи технологияларды енгізу нәтижесінде Қазақстан тәуелсіздік жылдарында ана өлімін 6 есеге, ал нәресте өлімін 7 есеге төмендетіп, еуропалық деңгейдегі көрсеткіштерге қол жеткізді. Бұл жетістіктер медициналық инфрақұрылымды нығайту мен кадрларды даярлаудың мемлекеттік саясатының жемісі болып табылады.
Дереккөз: https://t.me/DenMinPR
