2026 жылғы 1 қаңтардан бастап Қазақстанның денсаулық сақтау жүйесінде маңызды өзгерістер күшіне енеді. Мемлекет басшысының тапсырмасымен медициналық қызметтер пакеті қайта топтастырылып, ТМККК (тегін көмек) және МӘМС (сақтандыру) арасындағы шекара нақтыланды,деп хабарлайды 01info.kz Астана әкімдігінің баспасөз қызметіне сілтеме жасап.
ТМККК (Тегін көмек): Кімдерге және не тегін?
Жаңа ереже бойынша, әлеуметтік маңызы бар аурулар (онкология, туберкулез, АИТВ, гепатит, психикалық бұзылыстар, эпилепсия, орфандық аурулар, сондай-ақ инфаркт пен инсульттің алғашқы кезеңі) бойынша диагностика мен емдеу толықтай тегін болады.
Негізгі жаңалықтар:
-
Күдік туғандағы тексеру: Енді әлеуметтік маңызы бар ауруға күдік болса, сақтандыру мәртебесіне қарамастан барлық зерттеулер тегін жасалады.
-
Скринингтер: Қатерлі ісікті ерте анықтауға арналған скринингтер барлық азаматтар үшін қолжетімді.
МӘМС (Сақтандыру): Созылмалы ауруларды бақылау
Созылмалы аурулары бар азаматтарды бақылау және емдеу енді толықтай МӘМС жүйесіне ауыстырылады. Олардың қатарында:
-
Қант диабеті және артериялық гипертония;
-
Жүректің ишемиялық ауруы;
-
Бүйрек және тыныс жолдарының созылмалы аурулары;
-
ДЦП және ревматизм.
Бұл диагноздары бар пациенттер үшін сақтандыру мәртебесінің болуы — қымбат дәрі-дәрмектерге, кардиолог кеңесіне, Холтер мониторингі мен ЭКГ сияқты қызметтерге кедергісіз қол жеткізудің кепілі.
Неге сақтандыру маңызды?
Медициналық көмек құны өте жоғары: мәселен, инсультті емдеу 7 млн теңгеге дейін, ал диализ жылына 5 млн теңгеге дейін жетеді. МӘМС жүйесі азаматтарды осындай кенеттен болатын жоғары шығындардан қорғайды.
Маңызды: Әлеуметтік осал топтар үшін сақтандыру жарналарын мемлекет төлеуді жалғастырады. Ал экономикалық белсенді азаматтарға медициналық қызметтердің толық пакетін пайдалану үшін сақтандыру мәртебесін алдын ала реттеу ұсынылады.
